Kryeministri britanik, Boris Johnson ka bërë thirrje për më shumë mbështetje ushtarake për Ukrainën, teksa kjo e fundit po lufton forcat ruse në lindje të vendit.
Ai tha se sistemet e shumta të raketave lëshuese, të cilat janë kërkuar në mënyrë të përsëritur nga Kievi, mund të ndihmojnë Ukrainën të mbrohet kundër asaj që ai e quajti “artileri shumë brutale ruse”.
Qeveria ka premtuar 1.3 miliardë paund për mbështetje ushtarake për Ukrainën.
Mbretëria e Bashkuar ka furnizuar me mijëra pajisje deri tani, duke përfshirë 5,000 armë antitank Nlaw, të cilat shumë analistë besojnë se kanë pasur një ndikim të madh në rrjedhën e konfliktit.
“Nlaw ishte absolutisht kritik për mposhtjen e sulmeve tokësore ruse në fazat e hershme të luftës”, sipas Justin Bronk, i Institutit Mbretëror të Shërbimeve të Bashkuara.
Furnizimet e tjera të Mbretërisë së Bashkuar për Ukrainën përfshijnë raketa me rreze të shkurtër veprimi Brimstone 1, automjete të blinduara Mastiff, dronë të rëndë, eksplozivë, sisteme të mbrojtjes ajrore, pajisje për shikim natën dhe municione të armëve të vogla./UBTNews/