Ministrja e Drejtësisë, Albulena Haxhiu deklaroi se me urgjencë kanë adresuar gjetjet e Gjykatës Kushtetuese për Ligjin për Byronë për Verifikimin dhe Konfiskimin e Pasurisë së Pajustifikueshme. Ajo u bëri thirrje partive politike që ta mbështesin këtë ligj.
“Ne nuk kemi draftuar një ligj të ri. Nuk kemi pasur nevojë të draftojmë një version të ri të ligjit, por kemi adresuar vetëm katër çështje”, tha ajo.
Sipas saj, versioni me ndryshimet ka rikonstruktuar komisionin mbikëqyrës.
“Sapo të kemi deklaratat e Ministrisë së Financave dhe Qeverisë së Kosovës, ne do ta procedojmë sërish versionin me ndryshime. Sipas njoftimeve që kam nga kabineti, brenda javës do të kemi këto dy deklarata dhe menjëherë do ta procedojmë në qeveri e më pas në kuvend”, theksoi ajo.