Zëvendësministrja ukrainiane e Mbrojtjes tha sot se forcat ruse po përpiqeshin të krijonin një “korridor” rreth Kievit për të bllokuar rrugët e furnizimit, mes luftimeve të vazhdueshme rreth periferive të Kievit.
“Armiku po përpiqet të krijojë një korridor rreth Kievit dhe të bllokojë rrugët e transportit”, tha Hanna Maliar, zëvendësministrja e Mbrojtjes e Ukrainës, në komentet televizive.
“Mbrojtja e Kievit vazhdon. Forcat tokësore, forcat e sulmit ajror, forcat e operacioneve speciale, mbrojtja territoriale janë të përfshira. Banorët e Kievit janë gjithashtu shumë aktivë në mbrojtjen e Kievit. Është shumë e vështirë për armikun. Por ne duhet të flasim sinqerisht: Në fund të fundit, armiku nuk po heq dorë nga përpjekjet për të kapur Kievin. Sepse të marrësh Kievin në thelb do të thotë të marrësh Ukrainën. Kështu që ky është qëllimi i tyre”.
Administrata ushtarake rajonale e Kievit tha në një deklaratë sot se zonat përreth periferive perëndimore të Bucha, Irpin, Hostomel dhe Makariv si dhe rruga për në qytetin e Zhytomyr në perëndim dhe zonat në veri të Vyshhorod mbeten shumë të rrezikshme nga granatimet e forcave ruse.
“Gjatë 24 orëve të fundit, ka pasur më shumë se 40 incidente të bombardimeve nga trupat ruse të banesave dhe infrastrukturës sociale”, thuhet në deklaratë./UBTNews/