Lihtenshtejni do të ketë për herë të parë një grua në postin e kryeministres, pas zgjedhjeve parlamentare të mbajtura të dielën. Brigitte Haas, 60-vjeçare, avokate dhe drejtoreshë e Dhomës së Tregtisë dhe Industrisë, siguroi fitoren me partinë e saj Unioni Patriotik (VU).
Haas do të bëjë betimin më 20 mars, duke thyer një traditë njëqindvjeçare në principatë, ku posti i kryeministrit ka qenë gjithmonë i mbajtur nga burra. Lihtenshtejni, një vend i vogël mes Austrisë dhe Zvicrës, qeveriset nga Princi Hans-Adam II, i cili ka fuqi ekzekutive të konsiderueshme, por shumicën e kompetencave ia ka deleguar djalit të tij, Princit Alois.
Partia VU ka qeverisur tradicionalisht në koalicion me Partinë Qytetare Progresive (FBP), duke alternuar udhëheqjen për më shumë se 85 vjet./UBTNews/
