Një libër i ri ka rikthyer në qendër të vëmendjes një nga momentet më të diskutueshme të historisë televizive britanike: intervistën e Princeshës Diana me BBC-në në vitin 1995.
Autori Andy Webb, ish-gazetar i BBC-së, pretendon se rrjeti publik britanik ka ditur prej dekadash se intervista u sigurua përmes mashtrimit dhe e mbajti këtë fakt sekret për më shumë se 20 vjet.
Libri “Dianarama: Tradhtia e Princeshës Diana”, synon të zbulojë “shkallën e tradhtisë ndaj princeshës dhe mbulimin e mëvonshëm”. Publikimi vjen në një kohë të ndjeshme për BBC-në, e cila po përballet me kritika për redaktimin mashtrues të një fjalimi të Donald Trump.
Sipas një hetimi të pavarur të 2021, gazetari Martin Bashir kishte përdorur dokumente të falsifikuara për t’i krijuar vëllait të Dianës, Charles Spencer, përshtypjen se njerëz të afërt e spiunonin princeshën, duke e bindur atë të ndërmjetësonte intervistën historike.
Webb pretendon se disa persona brenda BBC-së e dinin të vërtetën vetëm katër muaj pas transmetimit, por zgjedhën të mos e informonin Dianën, duke e lënë atë në një gjendje pasigurie që ndikoi në jetën e saj deri në fund.
Dokumentet e falsifikuara e bënë Dianën të dyshonte te njerëzit më të afërt, duke përfshirë policinë, ndihmësit dhe sekretaren personale, duke e izoluar emocionalisht. Webb lidh këtë izolim me ngjarjet tragjike që pasuan, duke përmendur aksidentin e saj fatkeq:
“Ajo e humbi besimin te të gjithë. 18 muaj më vonë, e gjejmë në një Mercedes me një shofer të dehur, pa asnjë mekanizëm mbrojtës.”
Pretendimet e librit pritet të rikthejnë debatet mbi etikën gazetare të BBC-së, e cila ka pranuar se dokumentet e Bashir ishin falsifikuar dhe ka kërkuar falje. Akuzat e reja për një mbulim të qëllimshëm shumëvjeçar e vendosin rrjetin publik sërish nën presion. /A.Z/UBT News/