Forcat paqeruajtëse të Kombeve të Bashkuara në Libanin jugor të premten i kërkuan Bejrutit të sigurojë një hetim “të shpejtë” për vrasjen e një ushtari irlandez me armë zjarri pranë kufirit izraelit.
Autokolona e paqeruajtësve u sulmua të mërkurën vonë pranë fshatit Al-Aqbiya, tha ushtria irlandeze, duke plagosur tre anëtarë të tjerë të forcës së OKB-së, UNIFIL.
Kryeministri i përkohshëm i Libanit, Najib Mikati dhe shefi i ushtrisë, Joseph Aoun vizituan të premten selinë e UNIFIL në qytetin kufitar Naqura, duke denoncuar sulmin që i mori jetën paqeruajtësit, Sean Rooney.
Zëdhënësi i UNIFIL, Andrea Tenenti e quajti atë “një incident shumë të rëndë” dhe u tha gazetarëve se ishte “e rëndësishme” për autoritetet libaneze që të sillnin autorët para drejtësisë.
Është vdekja e parë e një anëtari të UNIFIL në një incident të dhunshëm në Liban që nga janari i vitit 2015, kur një paqeruajtës spanjoll u vra gjatë zjarrit hakmarrës izraelit.
UNIFIL u krijua në vitin 1978 për të monitoruar tërheqjen e forcave izraelite pasi ata pushtuan Libanin si hakmarrje për një sulm palestinez./UBTNews/