Ministri i Jashtëm rus, Sergey Lavrov tha të martën se situata rreth Ukrainës “është bërë një katalizator” për “një numër të madh problemesh” dhe për këtë arsye Rusia iu përgjigj “me shpejtësi” kërkesës së Sekretarit të Përgjithshëm të OKB-së, Antonio Guterres për bisedime.
“Ne patjetër e vlerësojmë dëshirën tuaj për të pasur një raund tjetër bisedimesh në këtë kohë të vështirë”, i tha ai Guterres në fillim të një takimi në Moskë që synonte të diskutonte situatën në Ukrainë dhe ndikimin e saj global.
Lavrov tha se takimi mes Guterres dhe presidentit rus Vladimir Putin më vonë të martën “thekson rëndësinë që ne i kushtojmë kontakteve tona me Kombet e Bashkuara”.
Guterres i tha Lavrovit se “ne jemi jashtëzakonisht të interesuar” për të gjetur mënyra për të krijuar kushte për dialog efektiv, për një armëpushim “sa më shpejt të jetë e mundur” dhe “kushte për një zgjidhje paqësore”.
“Unë e di që sot po përballemi me një situatë komplekse në Ukrainë, interpretime të ndryshme për atë që po ndodhë në Ukrainë, por kjo nuk kufizon mundësinë për të pasur një dialog shumë serioz se si mund të punojmë më mirë për të minimizuar vuajtjet e njerëzve”, tha Guterres.
“Është shumë e rëndësishme të mbështeten të gjitha vendet në mbarë botën në lidhje me ushqimin, në lidhje me energjinë, në lidhje me financat”, tha Guterres./UBTNews/