Shumë lagje në Shangai u vendosën përsëri nën izolim vetëm një ditë pasi u hoqën kufizimet në mbarë qytetin, pasi strategjia e rreptë e Kinës “zero-Covid” vazhdon të jetë në funksion.
Shanghai hoqi bllokimin e tij dy-mujor të mërkurën, duke lejuar shumicën e 25 milionë banorëve të tij të largohen nga komunitetet e tyre. Por gati 2 milionë njerëz ishin ende të mbyllur në shtëpitë e tyre në zonat e përcaktuara si “rrezik të lartë” nga qeveria.
Në një konferencë shtypi të enjten, zyrtarët e Shangait thanë se shtatë raste të reja Covid u zbuluan në rrethet Jing’an dhe Pudong të qytetit, duke rezultuar në mbylljen e shpejtë të katër lagjeve dhe përcaktimin si “zona me rrezik të mesëm” – që do të thotë se banorët do të kufizohen në shtëpitë e tyre për 14 ditë.
Më shumë se 470,000 njerëz ishin testuar, sipas zyrtarëve.
Kthimi në bllokim është rikujtimi më i fundit se pavarësisht lehtësimit të kufizimeve, politika e qeverisë për zero-Covid – e përbërë nga testime masive, karantinë të gjerë dhe bllokime të menjëhershme – do të vazhdojë të mbizotërojë në jetën e përditshme.
Ndërsa bizneset dhe dyqanet e Shangait u lejuan të rihapen dhe metroja dhe autobusët rifilluan shërbimet, banorët ende kanë nevojë për një test negativ Covid të marrë brenda 72 orëve për të përdorur transportin publik dhe për të hyrë në hapësirat publike./UBTNews/