Kryeministri Albin Kurti gjatë qëndrimit në Vjenë ka takuar Pamela Rendi Wagner, kryetare e Partisë Socialdemokrate.
Kurti gjatë këtij takimi ka folur për ecurinë e vaksinimit kundër COVID-19 në Kosovë, për të cilën tha se deri tani me një dozë janë vaksinuar mbi 64 për qind e popullatës, ndërsa me të dyja dozat mbi 56 për qind.
Ai ka folur edhe rreth rritjes të të hyrave tatimore për një të tretën, e cila është rezultat i luftimit të korrupsionit.
Për masat e ndërmarra kundër krimit dhe korrupsionit, kryeministri Kurti theksoi se gjatë këtij viti policia ka realizuar rreth 500 operacione e rreth 900 bastisje dhe ka shkatërruar 41 grupe kriminale.
“Nuk do të lejojmë asnjë individ apo grup të jetë më i fortë sesa shteti ligjor”, tha Kurti.
Në takim u bisedua edhe sektorin e arsimit për të cilën kryeministri Kurti potencoi nevojën për aplikimin e sistemit dual të arsimimit që e aplikon Austria.
Ndërsa, Pamela Rendi Wagner u interesua për reformat që ka nisur qeveria dhe për mënyrat se si do të mund të ndihmonte Austria.