Më shumë “pako të rrezikshme” janë dërguar në ambasadat e Ukrainës në Rumani dhe Danimarkë, tha ministri i Jashtëm ukrainas Dmytro Kuleba në një konferencë për shtyp të martën.
Kuleba diskutoi “fushatën e terrorit dhe frikësimit” që filloi të mërkurën e kaluar kundër ambasadave dhe konsullatave të Ukrainës me “një pako me eksploziv në Madrid”, e ndjekur nga “letra të përgjakshme me sy kafshësh në kryeqytete të tjera”.
“Unë vetëm mund ta përsëris këtë për të gjithë armiqtë e diplomacisë ukrainase dhe Ukrainës: nuk do të keni sukses të na frikësoni apo ndaloni”, tha Kuleba.
“Ne kemi pasur raste të reja të paketave të rrezikshme të dërguara në ambasadat tona. Sot, kjo iu bë ambasadës sonë në Rumani dhe ambasadës së Ukrainës në Danimarkë”, tha Kuleba.
Ai nuk specifikoi nëse këto pako përmbanin sy kafshësh si ato që janë dërguar në misionet diplomatike të Ukrainës në vende të tjera anembanë Evropës gjatë javës së kaluar.
“Të gjithë atyre që vazhdojnë t’i dërgojnë këto pako dhe të terrorizojnë ambasadat tona, ju them ju lutem relaksohuni, mos e humbni kohën dhe paratë tuaja për postë. Nuk do të arrini asgjë”, shtoi ai./UBTNews/