Kryetari i Akademisë së Shkencave të Shqipërisë, Akademik Skender Gjinushi, së bashku me një delegacion nga ky institucion i lartë shkencor, vizituan Parkun Shkencor të UBT-së.
Kryeakademiku shqiptar shprehu admirimin e tij për punën e bërë e rezultatet e arritura nga UBT, institucion me të cilin ai tha se Akademia e Shkencave e Shqipërisë do të ketë bashkëpunim për shkencën në të ardhmen.
Gjatë kësaj vizite, Akademiku Gjinushi u njoh me gamën e gjerë të specializimeve, laboratorëve, spin off-ve e qendrave teknologjike përbrenda ekosistemit ekzistues në Parkun Shkencor.
Rektori i UBT-së, prof.dr.Edmond Hajrizi, vlerësoi lartë vizitën e delegacionit të Akademisë së Shkencave të Shqipërisë, e simodos vullnetin e shprehur për bashkëpunim në fushën e shkencës.
Rektori Hajrizi në emër të UBT-së i ndau kreut të Akedemisë së Shkencave të Shqipërisë mirënjohje “për rolin historik të Akademisë, për mbështetjen e jashtëzakonshme për Kosovën, për ruajtjen, kultivimin dhe avancimin e arsimit e shkencës si dhe unifikimin e arsimit shqip”.
