Kryeministri irlandez, Micheál Martin ka arritur në Kiev për takimet me qeverinë ukrainase në shenjë mbështetje ndaj vendit të tij dhe Bashkimit Evropian.
“Në vizitë ai do të angazhohet me autoritetet ukrainase se si Irlanda dhe BE-ja mund të mbështesin nevojat aktuale dhe të ardhshme të vendit”, thuhej në një deklaratë nga zyra e tij, të mërkurën.
Martin pritet të vizitojë disa nga zonat rreth Kievit që u afektuan më së shumti nga pushtimi rus i Ukrainës.
“Populli i Irlandës qëndron me Ukrainën dhe popullin e saj përballë luftës imorale dhe terrorit të paprovokuar të Rusisë”, tha ai para vizitës.
“Bombardimet dhe sulmet ndaj civilëve nuk janë asgjë më pak se krimet e luftës, dhe unë do ta përdor vizitën time për të shprehur mbështetjen e Irlandës për lëvizjet për të mbajtur plotësisht përgjegjës ata që qëndrojnë pas këtyre sulmeve”.
Martin e përshkroi “shpirtin dhe vendosmërinë” e popullit ukrainas si frymëzim dhe shtoi se “Irlanda do të ofrojë çdo mbështetje për rrugën e Ukrainës drejt anëtarësimit të plotë në BE dhe do të vazhdojë të mirëpresë dhe mbështesë civilët që ikin nga kjo luftë”./UBTNews/