Deri në dy milionë njerëz që jetojnë pranë vijës së frontit në Ukrainën lindore rrezikojnë të zhvendosen nëse luftimet rifillojnë, paralajmëroi të enjten Këshilli Norvegjez për Refugjatët.
“Ne nuk duhet të nënvlerësojmë vuajtjet njerëzore që do të rezultojnë nga një konflikt, i cili do të rriste numrin e viktimave civile, do të shkaktonte zhvendosje masive dhe do të rriste nevojat humanitare”, tha në një deklaratë sekretari i përgjithshëm i OJQ-së, Jan Egeland.
Që nga fundi i vitit 2021, Perëndimi ka akuzuar Rusinë për grumbullimin e qindra mijëra trupave në kufirin ukrainas në përgatitje për një operacion ushtarak kundër Kievit, të cilin Moska e mohon.
Ukraina Lindore ka qenë tashmë në mes të një lufte midis Kievit dhe separatistëve pro-rusë që nga viti 2014, një konflikt që shpërtheu pasi Moska aneksoi Krimenë.
Lufta, e cila ka vrarë më shumë se 13,000 njerëz, është ‘zbutur’ që nga marrëveshjet e paqes në 2015, por zgjidhja politike e konfliktit është zhytur në mosmarrëveshje që atëherë. Përgjatë vijës së frontit, të shtënat me armë vazhdojnë të marrin jetë.
Sipas Këshillit Norvegjez të Refugjatëve, më shumë se 850,000 njerëz janë zhvendosur tashmë në Ukrainë për shkak të luftimeve.
Një rifillim aktiv i konfliktit, sipas OJQ-së, mund të zhbëjë përparimin e rëndësishëm të viteve të fundit në kushtet e jetesës së njerëzve në Ukrainën lindore.
Numri i njerëzve që varen nga ndihma humanitare atje ka rënë nga 5 milionë në 2015 në 3 milionë sot, sipas Këshillit Norvegjez të Refugjatëve./UBTNews/