Kremlini ka hedhur poshtë raportimet se ka pasur një telefonatë mes presidentit të zgjedhur të SHBA, Donald Trump, dhe presidentit rus, Vladimir Putin, pas zgjedhjeve presidenciale në SHBA. Këto raportime, të cilat dolën nga Washington Post dhe Reuters, sugjeronin se Trump kishte kërkuar nga Putin që të mos përshkallëzojë luftën në Ukrainë dhe e kishte informuar për praninë ushtarake të konsiderueshme të SHBA-së në Europë. Sipas këtyre raportimeve, telefonata kishte ndodhur të enjten, dy ditë pas zgjedhjeve.
Megjithatë, Kremlini ka mohuar këto informacione, dhe zëdhënësi Dmitry Peskov ka theksuar se “Putin nuk ka plane specifike për të biseduar me Trump për momentin”. Ai e quajti lajmin një “trillim të pastër” dhe një “informacion të rremë”, duke theksuar se nuk kishte pasur asnjë bisedë mes dy liderëve.
“Kjo është krejtësisht e pavërtetë. Ky është trillim i pastër, është thjesht informacion i rremë,” tha Peskov. “Nuk ka patur asnjë bisedë. Ky është shembulli më i dukshëm i cilësisë së informacionit që po publikohet tani, ndonjëherë edhe në botime mjaft me reputacion,” shtoi ai.
Megjithatë, të premten, Kremlini njoftoi se ishte i gatshëm të diskutonte për çështjen e Ukrainës me Trump, por nuk do të thotë që ai ishte i gatshëm të ndryshonte kërkesat e Moskës. Këto kërkesa përfshijnë heqjen dorë të Ukrainës nga ambiciet e saj për t’u bashkuar me NATO-n dhe dorëzimin e katër territoreve që aktualisht mbahen nën kontrollin rus.
