Vendimi i Lituanisë për ta shpallur Rusinë “një shtet që mbështet dhe kryen terrorizëm” është provokues dhe ekstremist, tha të mërkurën zëdhënësja e Ministrisë së Jashtme ruse, Maria Zakharova në një koment për radion ruse Sputnik.
“Në vendet që miratojnë dokumente, deklarata dhe formulime të tilla, ata ndërmarrin hapa të tillë ekstremistë – nuk ka si të quhet ndryshe. Të gjitha këto vende janë anëtare të NATO-s. Gjatë dekadave të fundit, ne kemi parë vazhdimisht veprime të paligjshme dhe agresive të NATO-s, gjë që çoi në humbje të mëdha jetësh”, tha Zakharova.
“Kjo duhet trajtuar pikërisht si një element provokimi, ekstremizmi dhe hipokrizie politike”, shtoi ajo./UBTNews/