Pas mbledhjes së Kryesisë së PDK-së, kryetari Memli Krasniqi njoftoi se nëse Lëvizja Vetëvendosje (LVV) nuk arrin të formojë shumicën e nevojshme për qeveri, PDK-ja është e gatshme të marrë përgjegjësinë për formimin e një qeverie të re, me Bedri Hamzën si kryeministër. PDK-ja do të veprojë në përputhje me Kushtetutën dhe parimet demokratike, pa penguar funksionimin e institucioneve.
Krasniqi theksoi se PDK-ja ka objektiva të qarta për zhvillimin ekonomik, forcimin e marrëdhënieve me partnerët ndërkombëtarë dhe avancimin e procesit të integrimit euroatlantik. Ai nënvizoi se partia ka kapacitetin dhe vizionin për ta çuar Kosovën përpara.
Bedri Hamza ritheksoi përkushtimin e tij për të realizuar një Kosovë më të zhvilluar dhe më të mirë për qytetarët, duke theksuar se formimi i institucioneve të reja është i domosdoshëm për të adresuar çështjet kyçe dhe për të përmbushur prioritetet shtetërore./UBTNews/
