Ministri i Administrimit të Pushtetit Lokal, Elbert Krasniqi, i ka reaguar emisarit të Bashkimit Evropian në dialogun Kosovë – Serbi, Miroslav Lajçak, i cili tha se “BE-ja nuk ka ndryshuar qëndrim rreth hapjes së Urës së Ibrit”.
Përmes, një postimi në profilin e tij në rrjetin social “X”, Krasniqi ka shkruar se është e qartë që ka një ndryshim në qëndrimin e BE-së për të njëjtën çështje.
“I dashur Miroslav Lajçak, BE-ja vetëm së fundi ka thënë se çështja e urës së Mitrovicës duhet të diskutohet në dialog. Më herët, e ka cekur vazhdimisht se ‘ura duhet të hapet për qarkullimin e automjeteve pa vonesa të mëtutjeshme’, sipas Raportit për Vendin (CR) mes viteve ’18-’22. Është e qartë se ka një ndryshim në qëndrimin e BE-së për të njëjtën çështje. Kështu, do të ishte korrekte t’u thuash njerëzve pse ky ndryshim? Çfarë ka ndryshuar nga viti 2023 për dallim me 2022 për BE-në që të kalojë nga ‘hapja e urës pa vonesa të mëtejshme’ te ‘duhen më shumë bisedime?’”, ka shkruar Krasniqi në platformën “X”./UBTNews/