Me shumicë votash, me 27 maj Asambleja Parlamentare e NATO-s, votoi pro avancimit të statusit të Kosovës në këtë organizatë.
Nga anëtare vëzhguese, Kosova u bë anëtare e asocuar e ogranizatës ushtarake veri-atlantike.
Njohësi i çështjeve të sigurisë, Hysen Gecaj, tregon se çfarë nënkupton ky avancim për Kosovën.
“Tani është edhe pjesëmarrëse e drejtpërdrejt, ku ka të drejtë që të ketë një numër të caktuar të asamleistëve ku do të organizojnë, koordinojnë dhe do të japin propozime, ide në emër të Republikës së Kosovës për çështje që i përkasin mbrojtjes dhe sigurisë” – tha Gecaj për UBTnews.
Edhe ish-zëvendësministri i brendshëm, Selam Shkodra, thotë se ngritja e Kosovës në këtë pozitë, ofron më shumë siguri.
“Është një avancim i statusit të vendit siç është Kosova dhe mendojë se kjo ofron më shumë siguri në rajon, në vendin tonë e gjithë kontinetin evropian” – shprehet Shkodra.
Asambleja Parlamentare e NATO-s është institucionalisht e ndarë nga NATO-ja, por shërben si një lidhje e rëndësishme mes NATO-s dhe parlamenteve të vendeve anëtare.
Ajo përbëhet nga 281 delegatë nga të 32 vendet anëtare të NATO-s.
Anëtarët e asocuar mund të paraqesin rezoluta dhe ndryshime në rezoluta. Megjithatë, ata nuk kanë të drejtë të votojnë për raportet, rezolutat apo udhëheqjen e Asamblesë dhe as nuk kontribuojnë në buxhetin e saj./UBTNews/
©️ Fjolla Gashi
