Udhëheqësi i konservatorëve flamandë, Bart De Wever, u betua sot si kryeministri i ri i Belgjikës në një ceremoni solemne përpara mbretit Philippe në pallatin mbretëror, së bashku me 14 anëtarët e kabinetit të tij.
De Wever, 54 vjeç, është separatisti i parë flamand që merr drejtimin e qeverisë federale të Belgjikës. Pas një periudhe të gjatë si kryebashkiak i Antverpës për 12 vjet, ai u bë lider i partisë N-VA që fitoi zgjedhjet legjislative tetë muaj më parë. Me këtë fitore, ai është në krye të një qeverie të djathtë, e cila përbëhet nga katër parti partnere.
Në fjalimin e tij pas betimit, De Wever premtoi të jetë më i rreptë në politikën e azilit dhe të sigurisë, si dhe të kufizojë përfitimet e papunësisë për të shpërblyer punën, duke caktuar dy vjet si periudhën maksimale për përfitime.
Qeveria e re, që përfshin 11 burra dhe katër gra, zëvendëson kabinetin e mëparshëm të kryeministrit liberal Alexander De Croo, që ka udhëhequr Belgjikën që nga tetori 2020. Ky ndryshim shënon kthimin në pushtet të “Aleancës së Re Flamane” (N-VA), e cila kishte udhëhequr një koalicion të qendrës së djathtë nga viti 2014 deri në vitin 2018.
Koalicioni i ri përfaqëson një shumicë të fortë në parlament, me 81 nga 150 deputetët, pas zgjedhjeve të mbajtura më 9 qershor të vitit të kaluar./UBTNews/