Komuniteti hebre në Turqi ka ngritur shqetësime rreth rritjes së antisemitizmit në mes të konfliktit të vazhdueshëm mes Izraelit dhe grupit terrorist Hamas.
Karel Valansi, kolumnist për gazetën hebreje turke Salom dhe uebsajtin e lajmeve T24, tha për DW se hebrenjtë po lidhen gjithnjë e më shumë me politikat izraelite.
“Ajo që shohim nga retorika e politikanëve, shtypit dhe rrjeteve sociale është kjo: Në perceptim, hebrenjtë janë larguar plotësisht nga pozita e qytetarëve të Republikës së Turqisë dhe kthehen në ambasadorë të shtetit të Izraelit, dhe zemërimi kundër këtij shteti është i drejtuar ndaj hebrenjve turq”, tha Valansi.
Sipas Aleancës Ndërkombëtare të Përkujtimit të Holokaustit, “akuzimi i qytetarëve hebrenj se janë më besnikë ndaj Izraelit, ose ndaj prioriteteve të supozuara të hebrenjve në mbarë botën, sesa ndaj interesave të kombeve të tyre” është shembull bashkëkohor i antisemitizmit. Shtetet e Bashkuara të Amerikës, Gjermania dhe më shumë se 40 qeveri të tjera kanë miratuar ose pranuar zyrtarisht përkufizimin e IHRA për antisemitizmin.
Sipas Valansit, tendencat antisemitike në diskursin publik, sikurse lavdet ndaj Adolf Hitlerit dhe ideologjive naziste, po rishfaqen dhe kjo po krijon pasiguri mes turqve hebrenj./UBTNews/