Vendimi i fundit i Kinës për të hedhur raketa mbi Tajvan duhet të kundërshtohet, tha të martën një komandant i lartë ushtarak amerikan.
Pekini ka kryer këtë muaj stërvitje të mëdha ajrore dhe detare rreth Tajvanit. Këto stërvitje kanë qenë përgjigje ndaj vizitës të kryetares së Dhomës së Përfaqësuesve të Shteteve të Bashkuara të Amerikës, Nancy Pelosi, në këtë ishull.
Këto stërvitje përfshinin lëshimin e raketave të shumta balistike në ujërat e Tajvanit – disa nga rrugët më të ngarkuara të anijeve në botë – dhe ishte hera e parë që Kina ndërmerr një hap të tillë që nga mesi i viteve 1990.
“Është shumë e rëndësishme që ne të kundërshtojmë këtë gjë. Unë e di që gorilla në dhomë po lëshon raketa mbi Tajvan”, u tha gazetarëve në Singapor komandanti i Flotës së Shtatë, zëvendës-admirali, Karl Thomas.
“Nëse ne thjesht e lejojmë që kjo të ndodhë dhe nuk e kundërshtojmë, ky do të jetë standardi tjetër”, shtoi ai.
“Është e papërgjegjshme të hedhësh raketa mbi Tajvan në ujërat ndërkombëtare, ku operojnë korsitë e transportit, ku operon transporti falas”.
Flota e Shtatë e ka bazën në Japoni dhe është pjesë thelbësore e pranisë së marinës së Uashingtonit në Paqësor.
Gjatë stërvitjeve të këtij muaji, media shtetërore kineze raportouan se disa nga raketat balistike të lëshuara nga Ushtria Çlirimtare Popullore ndoqën një trajektore direkt mbi kryeqytetin e Tajvanit Taipei, një përshkallëzim i ri që Pekini nuk e konfirmoi.
Partia komuniste e Kinës nuk e ka drejtuar kurrë Tajvanin, por ajo e konsideron ishullin si territorin e saj dhe është zotuar se një ditë do ta pushtojë ishullin, edhe me forcë nëse është e nevojshme.
Pretendimet për Tajvanin janë bërë më të theksuara nën drejtimin e Xi Jinping.
ShBA-ja dhe aleatët e tjerë perëndimorë kanë rritur kalimet e “lirisë së lundrimit” nga anijet detare të ngushticës së Tajvanit dhe Detit të Kinës Jugore për të përforcuar konceptin se ato dete janë rrugë ujore ndërkombëtare, duke shkaktuar zemërim nga Pekini.
Kina tha se kreu stërvitje të reja ushtarake të hënën derisa një delegacion ligjvënësish amerikanë vizitoi Taipein.
Kina dhe Tajvani janë ndarë gjatë luftës civile më 1940.
Raportet mes Pekinit dhe Taipeit janë përkeqësuar veçmas që nga viti 2016, kur Tsai Ing-wen u bë presidente e Tajvanit me platformën që nuk njeh pretendimet e Pekinit mbi këtë ishull vetëqeverisës.