Për herë të parë që nga shpërbërja e Bashkimit Sovjetik, Rusia po shfaq një interes intensiv për Kubën pasi Moska është bërë gjithnjë e më e izoluar për shkak të pushtimit të Ukrainës.
Zyrtarët e lartë rusë janë dyndur në vendin ishull këtë vit, duke filluar në mars me Nikolai Patrushev, sekretar i Këshillit të Sigurimit të Moskës, së bashku me drejtorin ekzekutiv të kompanisë shtetërore të naftës Rosneft, Igor Sechin.
Për vizitë ishte edhe përfaqësuesi i pronarëve të bizneseve ruse, Boris Titov.
Vizita më e profilit të lartë ishte nga Ministri i Jashtëm Sergey Lavrov në prill në një udhëtim njëjavor në aleatët e Amerikës Latine, përfshirë Venezuelën dhe Nikaraguan, të cilat si Kuba dhe Rusia janë subjekt i sanksioneve perëndimore.
“Rusia ka nevojë për partnerë tregtarë dhe aleatë politikë, me Amerikën Latine që ofron mundësinë e të dyjave”, tha për AFP Mervyn Bain, nga Universiteti Aberdeen në Skoci.
Javën e kaluar, zëvendëskryeministri rus Dmitry Chernyshenko hartoi një plan për të përshpejtuar bashkëpunimin me Kubën, e cila është zhytur në krizën e saj më të keqe ekonomike në tre dekada.
Të dy vendet kanë nënshkruar rreth një duzinë marrëveshjesh për të rifilluar marrëdhëniet tregtare në ndërtim, teknologji informacioni, banka, sheqer, transport dhe turizëm.
Kuba komuniste tashmë ishte detyruar të hapte ekonominë e saj të centralizuar ndaj bizneseve private të vogla dhe të mesme për shkak të problemeve të saj ekonomike në rritje.
Kuba ka njoftuar rihapjen e fluturimeve direkte midis Moskës dhe vendpushimit bregdetar të Varaderos dhe turistët rusë kanë qenë në gjendje të përdorin sistemin rus të pagesave Mir në vend që nga marsi.
Vizitat ruse në vendin ishullor të Karaibeve kanë ardhur vetëm disa muaj pasi presidenti kuban Miguel Diaz-Canel vizitoi homologun e tij rus, Vladimir Putin, në Moskë./UBTNews/