Koreja e Veriut ka reaguar për herë të parë ndaj krizës së fundit politike në Korenë e Jugut, duke e quajtur vendin fqinj një “shtet gangster” dhe duke e akuzuar presidentin Yoon Suk Yeol për vendosjen e një “diktature ndaj popullit”. Në një deklaratë të publikuar nga agjencia shtetërore KCNA, lideri Kim Jong Un e cilësoi veprimin e presidentit si “të çmendur” dhe një shkelje flagrante të të drejtave të popullit.
Deklarata vjen pas përpjekjes së presidentit Yoon për të shpallur ligjin ushtarak me qëllim shtypjen e asaj që ai e konsideroi si “forca pro-veriore dhe anti-shtetërore”. Megjithatë, ligji u rrëzua brenda vetëm gjashtë orësh nga Parlamenti, duke përshkallëzuar krizën politike dhe duke nxitur protesta masive në të gjithë vendin. Sipas KCNA, gjatë përpjekjes për të zbatuar ligjin ushtarak, ushtarë dhe helikopterë u angazhuan për të penguar deputetët të hynin në ndërtesën e asamblesë kombëtare. Ndërkohë, qindra mijëra qytetarë dolën në rrugë duke mbajtur pankarta dhe shkopinj me drita, duke kërkuar shkarkimin e Yoon Suk Yeol.
Ekspertët paralajmërojnë se kriza politike në Korenë e Jugut mund të shfrytëzohet nga vende autoritare si Koreja e Veriut, Kina dhe Rusia për të dobësuar aleancat perëndimore në rajon. Leif-Eric Easley, profesor në Universitetin Ewha, tha për The Guardian se kriza të tilla shpesh i japin avantazh rivalëve demokratikë.
Ndërsa Kim Jong Un akuzon Korenë e Jugut për shtypje, vetë Koreja e Veriut po përballet me kriza të rënda ekonomike dhe urie, ndërsa lideri i saj vazhdon të investojë në armë bërthamore dhe raketa balistike, duke thelluar tensionet rajonale./UBTNews/
