Kryeministri i Britanisë së Madhe, Boris Johnson do të vendosë sanksione kundër presidentit rus, Vladimir Putin dhe ministrit të jashtëm rus, Sergey Lavrov, në krye të paketës së sanksioneve të shpallura të enjten, tha një zëdhënës i Downing Street. Njoftimi u bë gjatë një telefonate të premten me krerët e NATO-s.
“Kryeministri i tha grupit se një katastrofë po përfshin Ukrainën dhe presidenti Putin u angazhua në një mision për të përmbysur rendin pas Luftës së Ftohtë. Ai paralajmëroi grupin se ambiciet e presidentit rus mund të mos ndalen me kaq dhe se kjo ishte një krizë euroatlantike me pasoja globale”, tha zëdhënësi i Downing Street.
Nëse Rusia do të shkëputej nga sistemi bankar ndërkombëtar SWIFT – Shoqëria për Telekomunikacionin Financiar Ndërbankar në mbarë botën – kjo do të pengonte ndjeshëm pjesëmarrjen e Rusisë në tregjet globale./UBTNews/