Ka një presion të ri mbi kryeministrin e Britanisë, Boris Johnson, mes pretendimeve të tjera se stafi i tij në Downing Street zhvilloi ndeja ndërsa vendi ishte në izolim gjatë pandemisë së koronavirusit.
The Daily Telegraph pretendon se dy festa u mbajtën për stafin në prag të funeralit të Dukës së Edinburgut në prill 2021.
Të nesërmen, imazhet e mbretëreshës Elizabeth e ulur e vetme në kishë – në përputhje me kufizimet e COVID-19 – ishin një shembull i ashpër i masave rigoroze të vendosura në të gjithë Mbretërinë e Bashkuar. Vendi ishte gjithashtu në një periudhë zie kombëtare.
Megjithatë, një natë më parë, stafi i Downing Street u mblodh për dy evente për të shënuar largimin e dy anëtarëve të ekipit të Boris Johnson, sipas Telegraph: drejtorit të tij të komunikimit dhe një prej fotografëve të tij personal.
Gazeta thotë se dëshmitarët i thanë se ndejat vazhduan deri në orët e para dhe përfshinin pije dhe vallëzim.
Këto akuza të reja – të cilat nuk janë mohuar nga Downing Street – vijnë në një moment kur kryeministri po lufton për të qëndruar në postin e tij.
Në fillim të kësaj jave Boris Johnson kërkoi falje para parlamentit për një festë tjetër të mbajtur gjatë bllokimit – një në të cilën ai mori pjesë. Ka pasur shumë thirrje për dorëheqjen e tij, duke përfshirë edhe nga brenda Partisë së tij Konservatore në pushtet.
Por një ndarje është shfaqur midis Partisë Konservatore Skoceze dhe partisë në Westminster. Douglas Ross, kreu i partisë në Skoci, tha se pozicioni i Johnson “nuk është më i qëndrueshëm” dhe është mbështetur nga deputetë të tjerë skocezë konservatorë.
Komenti i tij shkaktoi një kundërshtim nga Jacob Rees-Mogg, udhëheqës i Dhomës së Komunave, i cili e cilësoi Ross “të parëndësishëm”, duke shkaktuar zemërim në mesin e partisë në Skoci./UBTNews/