Lejimi i presidentit rus, Vladimir Putin, që të ketë sukses në pushtimin e tij në Ukrainë do të kishte pasoja “absolutisht katastrofike” për botën, kështu paralajmëroi kryeministri britanik, Boris Johnson, në një intervistë për CNN.
Duke folur në “State of the Union” disa orë pasi raketat ruse goditën Kievin, Johnson u kërkoi amerikanëve, britanikëve dhe të tjerëve në Perëndim të ruajnë vendosmërinë në ndëshkimin e Moskës, pavarësisht efektit që ka pasur lufta në çmimet globale të naftës.
“Unë thjesht do t’u thosha njerëzve në Shtetet e Bashkuara se kjo është diçka që Amerika historikisht e bën dhe duhet të bëjë, dhe kjo është të përparojë paqen, lirinë dhe demokracinë”, tha Johnson.
“Dhe nëse e lëmë Putinin të shpëtojë nga kjo, dhe thjesht të aneksojë, pushtojë pjesë të konsiderueshme të një vendi të lirë, të pavarur, sovran, gjë që ai është gati të bëjë… atëherë pasojat për botën janë absolutisht katastrofike”.
Ai më parë premtoi mbështetje të mëtejshme financiare për Ukrainën – përfshirë 525 milionë dollarë të tjera garanci për huadhënien e Bankës Botërore më vonë këtë vit, sipas Downing Street.
Johnson kërkoi që njerëzit të mos lodhen së mbështeturi Ukrainën, duke thënë se “Tani nuk është koha për të hequr dorë nga Ukraina”./UBTNews/