Britania e Madhe po përballet me një valë të madhe të koronavirusit të variantit Omicron, saqë dy doza vaksine nuk do të mjaftojnë për ta ndaluar atë, paralajmëroi dje kryeministri britanik Boris Johnson dhe njoftoi përshpejtimin e programit për dhënien e dozave shtesë të vaksinave.
“Të gjithë ata që plotësojnë kushtet, mbi moshën 18-vjeç, do të kenë mundësinë të marrin një dozë përforcuese në Angli para Vitit të Ri”, tha Johnson.
Duke iu drejtuar disa orë pasi shkencëtarët e qeverisë ngritën nivelin e alarmit të virusit korona në nivelin e katërt në një shkallë pesë-pikëshe, Johnson tha se programi i dozës përforcuese duhet të përshpejtohet pasi shkencëtarët ende nuk e dinë nëse omicron është më pak serioz se variantet e tjera, raporton Reuters.
“Cunami Omicron po vjen. Dhe kam frikë se tani është e qartë se dy doza vaksine thjesht nuk mjaftojnë për të dhënë nivelin e mbrojtjes që të gjithë kemi nevojë”, tha Johnson.
Johnson tha se shkencëtarët janë të vetëdijshëm se omicron është shumë më i lëvizshëm dhe tha se “vala e atij lloji” që do të kalonte përmes popullatës, e cila nuk mori një dozë shtesë të vaksinës, do të çonte në një numër kaq të madh të të shtruarve në spital.