Vizita e një prej ishujve më të bukur në Japoni së shpejti do të vështirësohet. Iriomote, në prefekturën Okinawa, do të kufizojë vizitorët në 1 mijë e 200 në ditë për të parandaluar mbiturizmin dhe për të mbrojtur habitatin e maceve të egra në Iriomote, një specie e rrezikuar vendase në ishull, sipas një njoftimi nga qeveria prefekturale e Okinawa-s.
Në një vit tipik para pandemisë, rreth 300 mijë udhëtarë vizituan Iriomote-n, që ka vetëm 2 mijë e 400 banorë. Reduktimi i vizitorëve do ta zvogëlojë ndjeshëm atë numër dhe vetëm 33 mijë turistëve do t’u lejohet ta vizitojnë atë ishull çdo vit.
Iriomote, ishulli i dytë më i madh në Okinawa dhe pjesë e grupit të ishujve Yaeyama, njihet për bukurinë natyrore të paprekur.
Meqenëse është gjeografikisht më afër Tajvanit se pjesa më e madhe e Japonisë, ishulli ka një klimë të ngrohtë gjatë gjithë vitit, duke e bërë atë një destinacion popullor për zhytje në skuba, not dhe shëtitje.
Përveç kufizimit të përgjithshëm të numrit të vizitorëve në ishull, qeveria prefekturale konfirmon se pesë vende të Trashëgimisë Botërore të UNESCO-s rreth Okinawas do të kufizohen në vitin që vjen, duke përfshirë malin Komi dhe lumin Nishida./UBTNews/