Një burrë 24-vjeçar i veshur si personazhi Joker sulmoi pasagjerët në një linjë treni në Tokio të dielën në mbrëmje, transmeton UBT News.
Rreth 17 persona u plagosën teksa po shkonin për festat e Halloween në qytet.
“Mendova se ishte një trik Halloween-i”, tha një dëshmitar për gazetën Yomiuri. “Pastaj, pashë një burrë që ecte në këtë rrugë, duke tundur ngadalë një thikë të gjatë”.
Sulmi ndodhi rreth orës 20:00 me orën lokale pranë stacionit Kokuryo dhe dëshmitarët okularë thanë se i dyshuari kishte veshur kostumin e personazhit Joker.
Mediat raportojnë se burri është arrestuar nga policia në vend.
Sipas gazetës Kyodo, ai i tha policisë se e adhuronte personazhin Joker në komiket e Batman.
Filmi hit i vitit 2019, “Joker”, me aktorin Joaquin Phoenix shfaqi një skenë të dhunshme ku ai sulmon disa burra në një tren pasi u ngacmua vazhdimisht prej tyre. Është një skenë kryesore, që shënon fillimin e transformimit të personazhit në Xhoker.
Raportet e mediave lokale thonë se i dyshuari u tha autoriteteve se donte të vriste njerëz në mënyrë që të dënohej me vdekje.
Agjencia e lajmeve AP, duke cituar Departamentin e Zjarrfikësve të Tokios, tha se tre nga të plagosurit kishin plagë të rënda. Sipas mediave lokale, një i moshuar ka mbetur pa ndjenja nga sulmi.
“Dyert e trenit ishin të mbyllura dhe ne nuk e kishim idenë se çfarë po ndodhte dhe u hodhëm nga dritaret”, tha një nga dëshmitarët.
Krimi i dhunshëm është i rrallë në Japoni, por ka pasur një numër sulmesh me thikë të profilit të lartë në vitet e fundit./UBTNews/