Kryetari i Sindikatës së punëtorëve të “Trepçës”, Ibrahim Januzi, ka konfirmuar se vendimin e Menaxhmentit për suspendimin e tij nga puna e ka marrë një hyje të objekti dhe nuk është njoftuar zyrtarisht.
Për të kundërshtuar vendimin ai tha se do t’i përdorin të gjitha mjetet ligjore. Përderisa sqaroi se gjendja e minatorëve është e rëndë madje jeta e tyre është në rrezik, për çka edhe i bëri thirrje Qeverisë që të bëjë një zgjidhje sa më shpejtë.
“Këtë vendim e kemi parë në hyrje të Minierës, konkretisht te roja fizike. Neve nuk na është dërguar ky vendim zyrtarisht, sepse në bazë të rregullave ligjore duhet të dërgohet zyrtarisht mirëpo këtë hap nuk e kanë marrë vetëm e kanë publikuar. Hapat tonë do t’i shqyrtojmë me kohë do t’i përdorim mjetet ligjore të mundshme në të drejtën tonë sepse ne jemi sindikatë jemi organ i pavarur në një formë ne kemi qenë ndërmjetësues. Kemi qenë vetëm ndërmjetësues dhe komunikues, ndërlidhës me minatorët në minierë dhe të gjithë ata që kanë pasur vullnetin për me dialogu me minatorët e për të cilën nuk ka ndodhur nuk ka pasur dialog të mirëfilltë na kanë sjellë në një situatë të rëndë”, deklaroi ai.
“Gjendja e minatorëve është jashtëzakonisht shumë e rëndë, jeta e tyre është në rrezik. Unë ju bëj thirrje që të reflektojmë dhe duhet bërë një zgjidhje t’i nxjerrim ata njerëz nga aty”, shtoi ai.
Ai u shpreh i bindur se greva do të vazhdojë dhe se janë të palëkundura deri në plotësimin e kërkesave të tyre.
“Minatorët janë të palëkundur në kërkesat e tyre dhe shpresojmë të gjejmë një zgjidhje t’i nxjerrim sa më parë ata nga atje. Gjendja e tyre është rënduar”, deklaroi ai tutje.
Menaxhmenti i Trepçës ka marrë vendim që t’i suspendojë nga puna kryetarin e sindikatës, Ibrahim Jonuzin, nënkryetarin e sindikatës, dy anëtarë dhe një minator.