Izraeli do të ndihmojë Ukrainën të zhvillojë një sistem alarmi të mbrojtjes ajrore, njoftoi të mërkurën Ministri izraelit i Mbrojtjes Benny Gantz, por vendi nuk planifikon të dorëzojë sisteme të armëve.
Gantz e bëri njoftimin gjatë një takimi me ambasadorët e Bashkimit Evropian në Izrael.
“Ne u kemi dërguar një kërkesë ukrainasve për të ndarë informacione në lidhje me nevojat e tyre për alarmet e mbrojtjes ajrore. Sapo të marrim këtë informacion, ne do të jemi në gjendje të ndihmojmë në zhvillimin e një sistemi të paralajmërimit të hershëm që shpëton jetë civilësh”, tha Gantz.
Por Gantz shtoi se ndërsa “Izraeli mbështet dhe qëndron me Ukrainën, NATO-n dhe Perëndimin”, dhe do të vazhdojë të dërgojë pajisje humanitare dhe mbrojtëse, “Izraeli nuk do të dorëzojë sisteme armësh në Ukrainë për shkak të një sërë konsideratash operacionale”.
“Ne do të vazhdojmë të mbështesim Ukrainën brenda kufizimeve tona, siç kemi bërë në të kaluarën”, shtoi ai./UBTNews/