Qeveria e koalicionit të dobësuar të Izraelit njoftoi të hënën se do të shpërndajë parlamentin dhe do të shpallë zgjedhje të reja, duke vendosur terrenin për rikthimin e mundshëm në pushtet të ish-kryeministrit Benjamin Netanyahu ose një periudhë tjetër bllokimi të zgjatur politik.
Zgjedhjet do të jenë të pestat e Izraelit në tre vjet. Katër zgjedhjet e mëparshme përfunduan në bllokim. Ndërsa sondazhet e parashikojnë Netanyahun, i cili tani është në gjyq, si kandidati kryesor, nuk është aspak e sigurt se partia e tij Likud mund të sigurojë shumicën e nevojshme parlamentare për të formuar një qeveri të re.
Kryeministri Naftali Bennett, një ish-aleat dhe ndihmës i Netanyahut, formoi qeverinë e tij një vit më parë me synimin për të ndalur ciklin e pafund të zgjedhjeve. Por qeveria e koalicionit, e cila përfshin parti nga i gjithë spektri politik, humbi shumicën e saj në fillim të këtij viti dhe është përballur me rebelime nga ligjvënës të ndryshëm javët e fundit.
Duke njoftuar planin e tij për të shpërbërë qeverinë gjatë një konference shtypi në televizion kombëtar, Bennett tha se kishte marrë “vendimin e duhur” në rrethana të vështira.
“Së bashku e nxorëm Izraelin nga gropa. Kemi arritur shumë gjëra në këtë vit. Para së gjithash, ne sollëm në qendër të skenës vlerat e drejtësisë dhe besimit”, tha Bennett, duke qëndruar përkrah partnerit të tij kryesor, Yair Lapid.
Sipas marrëveshjes së tyre të koalicionit, Lapid, i cili kryeson partinë e madhe centriste Yesh Atid, tani bëhet kryeministër i përkohshëm deri në zgjedhje, në të cilat ai pritet të jetë rivali kryesor i Netanyahut./UBTNews/