Mushkonjat dihet se janë fatkeqësia e verës italiane, pasi muajt më të nxehtë dhe më të lagësht të vitit sjellin bollëk të insekteve të bezdisshme në çdo kohë të ditës. Por italianët janë më pak të përgatitur për t’u përballur me kërcënimin e mushkonjave që mund të bartin virusin e Nilit Perëndimor (WNV), një sëmundje indigjene në Afrikë, Lindjen e Mesme, Azi dhe Australi, e cila kohët e fundit u përhap edhe në Evropë dhe Amerikën e Veriut.
Kjo verë në veçanti ka sjellë rritje dramatike të rasteve, duke shkaktuar shqetësim tek autoritetet shëndetësore në Itali.
Vetëm gjatë javës së fundit, 50 raste të tjera me ethet e Nilit Perëndimor janë raportuar në Itali, ku infeksionet me këtë virus kanë përjetuar rritje këtë verë.
Me rastet e fundit, numri i përgjithshëm i rasteve të raportuara në rajonet veriore Veneto, Piemonte, Lombardia dhe Emilia-Romagna tani është 144, sipas të dhënave të publikuara rishtazi nga organi i shëndetit publik të Italisë, Istituto superiore di sanità (ISS).
Në shtatë ditët e fundit janë shënuar edhe tri viktima si pasojë e virusit, duke e çuar në 10 numrin e viktimave./UBTNews/