Aeroporti Orio al Serio në Bergamo ka pezulluar përkohësisht të gjitha nisjet dhe uljet e avionëve, pas një incidenti me një aeroplan të linjës Ryanair. Mëngjesin e sotëm, një gomë shpërtheu në një fluturim që sapo kishte mbërritur nga Barcelona, duke shkaktuar një alarm dhe mobilizim të shpejtë të shërbimeve emergjente.
Fatmirësisht, nuk ka pasur të lënduar mes pasagjerëve dhe ekuipazhit, dhe zjarrfikësit janë mobilizuar menjëherë për të asistuar në situatë dhe për të ndihmuar pasagjerët të largoheshin nga avioni në mënyrë të sigurt. Pas ngjarjes, aeroporti njoftoi se do të rifillojë operacionet normale sapo avioni të hiqet nga pista.
Autoritetet e aeroportit kanë siguruar se po punohet për të minimizuar vonesat dhe për të rikthyer fluturimet në normalitet sa më shpejt të jetë e mundur. Pasagjerët janë inkurajuar të kontaktojnë linjat e informacionit të fluturimeve për çdo detaj në lidhje me oraret e fluturimeve të tyre.
Ky incident ka nxitur shqetësime mbi sigurinë e fluturimeve, por autoritetet kanë theksuar se janë marrë të gjitha masat e nevojshme për të garantuar sigurinë e udhëtarëve dhe stafit në aeroport./UBTNews/