Në protestën e sotme në Hagë në mbështetje të ish-krerëve të UÇK-së në Hagë i pranishëm ishte edhe ish-pjesëtari i saj nga Maqedonia e Veriut, Izmi Nura.
Ai ka thënë se përmes protestës së sotme synojnë t’i tregojnë botës që ish-luftëtarët që sot kanë dalë para trupit gjykues janë persona që i kanë dhënë lavdi kombit shqiptar.
“Motra e vëllezër, ne jemi këtu që të deklarojmë botërisht se luftëtarët e ndaluar në Hagë, te cilët sot kanë kaluar para trupit gjykues, duke u akuzuar për krime lufte, janë çlirimtarë, janë luftëtarë të lirisë, janë luftëtarë, të cilët kombit shqiptar i kanë dhënë lavdi me luftën e tyre. Ata janë lavdia e UÇK-së dhe kjo kurrë nuk do të ndryshojë. Sepse ata do ta fitojnë pafajësinë, ata do të kthehen triumfatorë, pavarësisht përpjekjeve të Serbisë e atyre që e mbështesin për të na e njollosur historinë e Luftës Çlirimtare të Kosovës, ajo mbetet një faqe e lavdishme e historisë kombëtare”, ka thënë ai.