Gjykata e Lartë e Iranit ka falur dy gazetaret Niloofar Hamedi dhe Elaheh Mohammadi, të cilat raportuan për vdekjen e Mahsa Amini në paraburgimin e policisë morale, ngjarje që shkaktoi protesta mbarëkombëtare në vitin 2022. Vendimi u mor pas miratimit të liderit suprem, Ayatollah Ali Khamenei, si pjesë e një liste faljesh të përgatitur nga kreu i gjyqësorit, në përkujtim të 46-vjetorit të Revolucionit Iranian të vitit 1979.
Hamedi dhe Mohammadi, të dënuara fillimisht me 13 dhe 12 vjet burg, u akuzuan për “bashkëpunim me Shtetet e Bashkuara”, “konspiracion kundër sigurisë kombëtare” dhe “propagandë kundër regjimit”. Megjithatë, pas 17 muajsh burg, ato u liruan përkohësisht vitin e kaluar, ndërsa tani janë falur plotësisht nga autoritetet gjyqësore.
Protestat e shkaktuara nga vdekja e Amini ishin më të mëdhatë që nga Revolucioni Islamik i vitit 1979, duke sjellë trazira të mëdha në vend. Autoritetet iraniane kanë fajësuar SHBA-në për nxitjen e demonstratave, një akuzë të cilën Uashingtoni e ka mohuar./UBTNews/
