Iraku thotë se eksportoi 11.7 miliardë dollarë naftë në mars, niveli më i lartë në 50 vjet, pasi çmimet e naftës së papërpunuar u rritën pas pushtimit rus të Ukrainës.
Eksporti rekord i naftës, i cili përbën më shumë se 90 për qind të të ardhurave të Irakut, është një nxitje e madhe për arkën e shtetit.
Prodhuesi i dytë më i madh në Organizatën e Vendeve Eksportuese të Naftës (OPEC), Iraku eksportoi 100 milionë fuçi për të ardhura prej 11.7 miliardë dollarësh, të ardhurat më të larta që nga viti 1972, tha Ministria e Naftës.
Në shkurt, të ardhurat nga nafta arritën nivelin më të lartë në tetë vjet, prej 8.5 miliardë dollarësh, me eksporte ditore prej 3.3 milionë fuçi nafte, përcjell Klankosova.tv
Të ardhurat nga nafta janë kritike për qeverinë e Irakut, me vendin e zhytur në një krizë financiare dhe ka nevojë për fonde për të rindërtuar infrastrukturën pas dekadash lufte shkatërruese.
Iraku, me një popullsi prej rreth 41 milionë banorësh, po përballet gjithashtu me një krizë të madhe energjetike dhe pëson ndërprerje të rregullta të energjisë elektrike.
Pavarësisht nga rezervat e tij të mëdha të naftës dhe gazit, Iraku mbetet i varur nga importet për të përmbushur nevojat e tij për energji.