Infeksionet me Covid-19 në Mbretërinë e Bashkuar kanë filluar të bien, sugjerojnë shifrat e fundit javore të Zyrës për Statistikat Kombëtare.
Numri i pacientëve në spital me koronavirus po stabilizohet gjithashtu dhe nivelet mbeten nën ato që shiheshin në valët e mëparshme të pandemisë. Por në total më shumë se 170,000 njerëz kanë vdekur në Mbretërinë e Bashkuar që nga shpërthimi i virusit.
Ndërkohë, Anglia ka hequr testet falas të koronavirusit për shumicën e njerëzve dhe rregullat rreth asaj se kur shumica mund të kenë akses në teste falas janë shtrënguar në Skoci dhe Uells.
Megjithëse numrat e rasteve mbeten të larta, me një në çdo 15 persona të infektuar në javën që përfundon më 9 prill, numri i përllogaritur i infeksioneve ishte ulur 10% në javën e kaluar.
Një nënvariant shumë i transmetueshëm i Omicron, i quajtur BA.2, po shkakton tani shumicën e rasteve.
Kufizimet në Uells u lehtësuan më 28 mars, pas lehtësimit të mëparshëm të masave në Angli dhe Irlandën e Veriut.
Të martën në Skoci maskat për fytyrën pushuan së qeni të detyrueshme në dyqane dhe në transportin publik.
Një vaksinim shtesë përforcues tani po u ofrohet njerëzve të moshës 75 vjeç e lart dhe disa grupeve të tjera./UBTNews/