Para se tri motra dhe fëmijët e tyre të gjendeshin të vdekura në një pus, ato lanë një mesazh duke fajësuar familjen me të cilën ishin martuar.
Kalu, Kamlesh dhe Mamta Meena ishin viktima të një mosmarrëveshjeje për prikat – shuma të majme që prindërit indianë paguajnë për të martuar vajzat e tyre.
Motrat ishin martuar me vëllezër nga e njëjta familje dhe jetonin nën të njëjtën çati, por ato u dhunuan rregullisht nga bashkëshortët dhe prindërit e tyre.
Të trija u gjetën të vdekura muajin e kaluar pranë shtëpisë së tyre martesore, së bashku me djalin katër vjeçar dhe një fëmijë të mitur të Kalu. Dy nga motrat ishin shtatzënë.
“Ne nuk duam të vdesim, por vdekja është më e mirë se abuzimi i tyre”, shkruhej në një mesazh në WhatsApp të lënë nga njëra prej motrave pas zhdukjes së tyre, tha një kushëri.
“Vjehërrit tanë janë arsyeja për vdekjet tona. Ne po vdesim së bashku sepse është më mirë se të vdesim çdo ditë”.
Babai i vajzave, Sardar Meena, tha se jeta kishte qenë ferr për vajzat e tij, burrat e të cilave i ndaluan të arsimoheshin dhe i ngacmonin vazhdimisht për më shumë pagesa.
“Ne tashmë u kishim dhënë atyre kaq shumë gjëra, ju mund t’i shihni në shtëpinë e tyre” tha ai për AFP, duke numëruar shtretërit, televizorët dhe frigoriferin që i dha familjes.
“Unë jam baba i gjashtë vajzave, ka një limit sa mund të jap”, shtoi Sardar, i cili fiton pak të ardhura.
Policia ka arrestuar tre bashkëshortët, nënën e tyre dhe një kunatë.
India e shpalli të jashtëligjshme praktikën e pagimit të prikave më shumë se 60 vjet më parë, dhe ngacmimi ose zhvatja për pagesat është një vepër penale. Por zakoni vazhdon, veçanërisht në zonat rurale.
Mediat lokale të lajmeve raportojnë rregullisht për mosmarrëveshjet martesore që përfundojnë me vrasje.
Vitin e kaluar, një burrë u burgos përjetë pasi përdori gjarpërinjtë helmues për të vrarë gruan e tij dhe për të marrë kontrollin e vetëm të pronës së tyre, e cila përfshinte një makinë të re dhe 6,500 dollarë të siguruara nga familja e saj si prikë.
Byroja Kombëtare e Regjistrimeve të Krimit të Indisë regjistroi rreth 7,000 vrasje të lidhura me prikën në vitin 2020 – që nënkupton rreth 19 gra çdo ditë.
E njëjta agjenci raportoi se më shumë se 1700 gra vranë veten atë vit për “çështje të lidhura me prikën”.
Ekspertët thonë se numri aktual i rasteve është shumë më i lartë./UBTNews/