Një incident ka ndodhur sot në lagjen Telep të Novi Sadit gjatë 15 minutave të heshtjes në nder të viktimave të tragjedisë në Stacionin Hekurudhor. Një drejtues makine, në përpjekje për të shmangur turmën e qytetarëve të mbledhur para kishës “Kirili dhe Metodi”, ka përplasur një person që po qëndronte në rrugë, por ky i fundit ka arritur t’i shmanget në momentin e fundit.
Sipas raportimeve, shoferi e ka ndalur makinën, ka dalë jashtë dhe është përfshirë në një debat verbal me të pranishmit, para se të largohej me shpejtësi. Policia ka nisur ndjekjen e tij, por ende nuk ka informacione zyrtare për rezultatin e ndjekjes.
Incidenti ka shtuar edhe më shumë tensionin në Novi Sad, ku qytetarët kanë vazhduar protestat e tyre kundër mungesës së reagimit nga autoritetet pas tragjedisë. Në shenjë revolte, disa qytetarë janë bashkuar me prindërit dhe edukatorët e çerdhes “Dunavski cvet”, duke bllokuar rrugët pranë institucionit.
Ndërkohë, punonjësit e Qendrës Klinike të Vojvodinës kanë dalë sërish në rrugë për të mbajtur minutat e heshtjes, duke qëndruar të rreshtuar në trotuar. Atyre iu bashkuan edhe qytetarë të tjerë, si dhe shoferë të cilët ndaluan makinat e tyre dhe bllokuan rrugën Hajduk Veljkova, edhe pse nuk kishte ndonjë bllokadë të organizuar.
Ky incident është vetëm një tjetër episod në rritjen e pakënaqësisë qytetare, ndërsa protestat në Serbi vazhdojnë me bllokada rrugësh dhe mosbindje civile. Ende nuk ka një reagim zyrtar nga autoritetet për incidentin në Novi Sad, ndërsa qytetarët kërkojnë masa konkrete dhe një përgjigje të qartë për kërkesat e tyre./UBTNews/