Vendimi për të filluar bisedimet për anëtarësimin e Ukrainës në BE është në teh të thikës pasi Hungaria tha se nuk do të përkulet ndaj presionit në rritje për të dhënë dritën jeshile.
Kërcënimi i kryeministrit hungarez, Viktor Orban për të vënë veton ndaj nisjes së negociatave po merret seriozisht, me ministrin e Jashtëm të Ukrainës që paralajmëroi për “pasoja shkatërruese” për vendin e tij nëse bisedimet bllokohen.
27 udhëheqësit e BE-së do të takohen të enjten dhe të premten dhe një diplomat tha se disponimi në Bruksel ishte gjithnjë e më i zymtë.
Orbán, i cili mburret për lidhjet e tij të forta me presidentin rus, Vladimir Putin, ka thënë se do të bllokojë vendimin për zgjerimin e BE-së dhe potencialisht do të bllokojë mbështetjen e vazhdueshme financiare për Ukrainën, raporton Guardian
Javën e kaluar, në një lëvizje sfiduese, Orbán deklaroi se Ukraina ishte “një nga vendet më të korruptuara në botë”, disa orë pasi presidenti francez, Emmanuel Macron, e kishte takuar atë për t’u përpjekur ta bindte të mos vërë veton ndaj bisedimeve të zgjerimit të BE-së.
Të dielën, ai dhe presidenti ukrainas, Volodymyr Zelenskiy, ndanë një shkëmbim të shkurtër dhe me sa duket intensiv në inaugurimin e presidentit të ri të Argjentinës.
Ambasadorët e BE-së në Bruksel po punojnë jashtë orarit në përpjekje për të zgjidhur çështjen.
Komisioni Evropian tha se Ukraina i kishte përmbushur të gjitha kërkesat për fillimin e negociatave më 8 nëntor.