Biznismenët Elon Musk dhe Jeff Bezor janë në ‘luftë’ për titullin “Njeriu më i pasur në botë”. Megjithatë, nëse marrim parasysh historinë, ndikimi i tyre zbehet nëse krahasohen me njeriun më të pasur të të gjitha kohërave – mbretin afrikan i quajtur Mansa Musa. Ai ishte ish-sundimtar i Perandorisë Mali në Afrikën Perëndimore.
Musa I u lind në vitin 1280. Ai e mori titullin “Mansa” (që e ka kuptimin “sulltan” apo “sundimtar” në gjuhën mandinka), pasi mori fronin në vitin 1312. Ai erdhi në pushtet pasi paraardhësi i tij dhe vëllai, Mansa Abu-Bakr, abdikoi të shkonte në një ekspeditë rreth Oqeanit Atlantik – një udhëtim nga i cili nuk u kthye më kurrë.
Perandoria e Malit u zgjerua nën sundimin e tij dhe shtrihej 2 mijë milje nga Oqeani Atlantik deri në kufijtë e sotëm të Nigerit.
Ishte një nga perandoritë më të mëdha në Afrikën Perëndimore. Gjuha dhe ligjet ndikuan në kulturën aktuale të vendit.
Pasuria e perandorit Mansa Musa erdhi nga burimet natyrore të regjionit, të cilat ishin ari dhe kripa.
Në shekullin e 14-të, Perandoria e Malit kishte gati gjysmën e arit në botë. Dhe pothuajse çdo pjesë i takonte perandorit Mansa Musa. Siç deklaroi një specialist, perandori i Malit kishte qasje të pakufizuar në burimet më të çmuara të kohës. Edhe qendrat tjera tregtare ishin të vendosura në territorin e sundimtarit Mansa Musa, kështu që ai krijoi të ardhura edhe nga ato biznese.
Pasuria e tij neto është 400 miliardë dollarë. Një profesor i tha BBC-së në një intervistë se “rrëfimet bashkëkohore rreth pasurisë së Musait do t’ju lënë pa frymë sa është pothuajse e pamundur të kuptosh se sa i pasur dhe i fuqishëm ishte ai me të vërtetë”.
Mansa Musa ishte edhe filantropist. Sipas rrëfimeve historike, Mansa Musa u dha ar njerëzve të varfër që takoi gjatë rrugëtimit të tij dhe gjithashtu tregtoi arin për suvenire kur kaloi nëpër Kajro dhe Medinë.
Historiani i lashtë Al-Umari shkroi për bisedën e tij me një emir nga Kajro, i cili takoi Mansa Musa-n. Ai tha se mbreti afrikan zgjodhi të fliste përmes një përkthyesi, ndonëse edhe vetë e fliste rrjedhshëm gjuhën arabe./UBTNews