Ministrja e Drejtësisë, Albulena Haxhiu mbrojti sot shefen e Grupit Parlamentar të Lëvizjes Vetëvendosje, Mimoza Kusari-Lila, pas publikimit të një përgjimi të saj me zyrtarin e Listës Serbe, Slavko Simiq, ku përmendet edhe Milan Radojiçiq.
Ajo në konferencën për medie, pas mbledhjes së qeverisë tha se Kusari-Lila nuk i është bindur asnjë urdhri të Listës Serbe dhe se përgjimet janë të montuara.
“Lista Serbe nuk ka mundur t’i bëjë presion dhe as ta shantazojë shefen e GP-së Mimoza Kusari-Lila. Prej kohës kur është bërë ky përgjim kemi një sërë veprimesh që konfirmojnë sundimin e ligjit në veri të Kosovës”, tha ajo.
Shefja e Grupit Parlamentar të Lëvizjes Vetëvendosje, Mimoza Kusari-Lila ka deklaruar se nuk ka menduar asnjëherë të vetme të japë dorëheqje për shkak të përgjimeve të publikuara të hënën (10 korrik) në media. Ndërkohë, ajo ka shtuar se Slavko Simiq i Listës Serbe ka dashur “t’a kushtëzojë” ose “t’a kurthojë”.