Qendra Kosovare për Rehabilitimin e të Mbijetuarve të Torturës (QKRMT), organizoi ekspozitën “Lule kundër luftës”, me punimet e Liudmyla Makei e cila është refugjate ukrainase në Kosovë.
Ekspozita u hap në Ditën Botërore të Refugjatëve ku presidentja e Kosovës, Vjosa Osmani, shprehu solidaritetin ndaj të gjithë refugjatëve në botë, në veçanti atyre ukrainas që po qëndrojnë në Kosovë.
Osmani tha se Kosova do të avokojë gjithmonë për të drejtat e refugjatëve, pasi qytetarët kosovarë kanë qenë të tillë në vitin 1999.
“Fati i popullit tim na bën të përjetojmë të qenit refugjat më 1999 kur ekzistenca jonë ishte në pikëpyetje. Sikurse gati si të gjithë të tjerët në Kosovë edhe vet kam qenë refugjate, ndaj në këtë ditë nuk ka sesi mos të solidarizohem me të gjithë refugjatët anë e kënd botës, por në veçanti me ata që sot e kanë strehë Republikën tonë. Populli i Kosovës e ndjen më së miri këtë, pasi 24 vjet më parë neve na janë hapur dyert në shumë shtete të botës… Në Ditën Botërore të Refugjatëve ne duhet të bashkohemi për të nderuar qëndrueshmërinë, forcën dhe guximin e refugjatëve anë e kënd botës. Është një ditë për të njohur gjendje e vështirë të atyre që janë detyruar nga shtëpitë e tyre për shkak të luftërave, persekutimeve apo fatkeqësive. Refugjatët nuk janë thjesht numra, por janë individ me ëndrra, aspirata dhe potencial. Ata mishërojnë shpirtin e paepur të mbijetesës njerëzore dhe shpirtin e palëkundur për një të ardhme më të mirë. Ekspozita e sotme nga Liudmyla është pikërisht një dëshmi e kësaj”, theksoi ajo.
E drejtoresha e QKRMT-së, Feride Rushiti, tha se ofrimi i ndihmës për refugjatë është obligim moral.
“Duke kujtuar këto përvoja të dhimbshme është detyra jonë morale të hapim zemrën dhe të ofrojmë ndihmën tonë refugjatëve aktual. Për këtë arsye, ndihemi krenar që sot po e organizojmë një ekspozitë pak më ndryshe, e cila pasqyron lulet si simbol i paqes dhe si simbol i shpresës”, tha Rushiti.
Ndërkaq, drejtori i UNHCR-së në Kosovë, Arjun Shrestha, tha se numri i madh i refugjatëve në botë është dëshmi për angazhim më të madh për zgjidhjet politike të konflikteve.
“Sot, po shënojmë Ditën Botërore të Refugjatëve në një botë që nuk ka zgjidhje për më shumë se 110 milionë njerëz të cilët janë detyruar të ikin, një botë që lë në harresë shumë nga 35 milionë refugjatët, në një botë që mbetet e paaftë për të zgjidhur konfliktin që lë miliona në mërgim dhe në një botë që shpesh i pengon refugjatët të kenë qasje në shërbime ose në punë që u nevojitet për të jetuar me dinjitet, por kjo nuk duhet të jetë kështu. Faleminderit që jeni këtu sot, për të treguar solidaritet me miliona njerëz në mbarë botën që janë detyruar të ikin nga lufta, dhuna apo përndjekjet. Ju po i njihni vështirësitë dhe lini përvojën e tyre duke nderuar guximin, shpresën dhe kontributin e tyre në komunitet. Duke qenë këtu sot, ne po e pranojmë që të gjithë mund të angazhohemi për të bërë më shumë për të ofruar më shumë shpresë, mundësi dhe zgjidhje për refugjatët ndërsa ata janë larg shtëpive të tyre”, theksoi ai.
Në anën tjetër, autorja e ekspozitës, refugjatja ukrainase, Liudmyla Makei, tha se pikturat paraqesin universin e saj ideal ku nuk ka luftë dhe dhimbje.
“Prishtina është shtëpia ime e dytë. Lulet janë universi im ideal. Aty nuk ka luftë dhe dhimbje. Unë dua që e gjithë bota të jetë kështu. Në të njëjtën kohë, unë dua të ndihmoj kolegët e mi ukrainas që janë aktualisht në robërinë ruse dhe të mbështes gazetarët që do të shkruajnë për viktimat e dhunës seksuale. Është shumë e rëndësishme për mua, për vendin tim, për të gjithë botën. Kjo është arsyeja pse vendosa ta shes pikturën time. Do të jem e lumtur nëse dëshironi ta blini pikturën time. Paratë e mbledhura do t’ia jap Unionit Kombëtar të Gazetarëve të Ukrainës dhe këtë ekspozitë ia kushtoj Ukrainës dhe falënderoj Kosovën për mbështetjen”, theksoi ajo.
Dita Botërore e Refugjatëve është themeluar nga Kombet e Bashkuara për të nderuar guximin, forcën dhe vendosmërinë e grave, burrave dhe fëmijëve të cilët janë të detyruar të largohen nga shtëpitë e tyre nën kërcënimin e persekutimin, konfliktit dhe dhunës.