Një gjykatë franceze i dha një dënim me katër vjet burg një personi për ndezjen e një zjarri që dëmtoi rëndë një katedrale gotike në qytetin e Nantes në vitin 2020.
Emmanuel Abayisenga, një 42-vjeçar nga Ruanda, po përballet gjithashtu me veprime ligjore për një incident tjetër ku dyshohet se vrau një prift në Francë më vitin 2021.
Gjykata vendosi se Abayisenga nuk ishte i shëndetshëm mendërisht në kohën e zjarrit në Katedralen e Shën Pjetrit dhe Shën Palit kur dha dënimin.
Gjykata gjithashtu e ndaloi Abayisengan të mbajë armë dhe të qëndrojë në rajonin perëndimor Loire-Atlantique, ku ndodhet Nantes, për pesë vjet.
Abayisenga, i cili mbërriti në Francë në vitin 2012 dhe kishte qenë vullnetar për dioqezën lokale, kishte pranuar se e kishte shkaktuar zjarrin në fillim të seancës.
Ai tha se kishte hyrë në katedrale për t’u lutur, por më pas “humbi kontrollin” pasi kaloi pranë një lokacioni në ndërtesën ku pësoi një sulm të dhunshëm në vitin 2018.
Duke folur përmes një përkthyesi, ai tha se ishte penduar për atë që ndodhi dhe kërkoi falje.
Abayisenga ka një histori kërkesash të pasuksesshme për azil dhe mori një urdhër për t’u larguar nga Franca në vitin 2019, gjë që tha se e kishte shqetësuar thellësisht.
Gjykata pranoi problemet shëndetësore të të pandehurit, përfshirë vështirësitë në dëgjim, probleme me mushkëri dhe çrregullime të të ngrënit.
Prokurorja Veronique Wester-Ouisse tha se i pandehuri i vuri zjarrin katedrales me vetëdije për shkak të “zemërimit të madh dhe një ndjenjë hakmarrjeje të lidhur me situatën e tij”.
Zjarrfikësit ishin në gjendje të frenonin shpejt zjarrin dhe të shpëtonin strukturën kryesore, por organi i tij i famshëm i shekullit të 17-të, i cili i kishte mbijetuar revolucionit francez dhe bombardimeve gjatë Luftës së Dytë Botërore, u shkatërrua./UBTNews/