Presidenti i lëvizjes “Çlirimi” në Serbi, Mllagjan Gjorgjeviq, vlerësoi sot se marrëdhëniet e presidentit serb, Aleksandar Vuçiq me administratën e Donald Trumpit do t’i kushtojnë Serbisë. Sipas tij, kjo mund të shihet nga njoftimi i ambasadës amerikane në Beograd, e cila mbështet Marrëveshjen e Washingtonit me Kosovën.
“Ne e theksuam këtë kur e nënshkruan këtë dokument. Marrëveshja e Washingtonit është e dëmshme sepse praktikisht heq të gjitha pengesat në rrugën e njohjes së të ashtuquajturës pavarësi të Kosovës”, tha Gjorgjeviq.
Ai gjithashtu tha se Marrëveshja e Washingtonit dhe Shengeni i Vogël nuk janë vetëm rruga për njohjen e Kosovës, por edhe për krijimin e një “Shqipërie të Madhe”.
“Ambasada amerikane tani po na informon se ky proces do të çojë në një marrëveshje të detyrueshme për normalizimin e marrëdhënieve midis Kosovës dhe Serbisë, në qendër të së cilës është njohja reciproke. Ata vizatuan për ne në të zezë dhe të bardhë atë që Vuçiqi e nënshkroi në Washington dhe atë që ai do ta nënshkruajë më tej”, tha Gjorgjeviq.
Ai kujtoi se deklarata e Ambasadës Amerikane thekson diversifikimin e energjisë si një qëllim të rëndësishëm nga marrëveshja.
“Në praktikë, kjo do të thotë një largim nga bashkëpunimi i energjisë me Rusinë dhe blerja e energjisë nga Shtetet e Bashkuara. Pra, ne duhet të rrezikojmë marrëdhëniet me mikun tonë historik dhe garantuesin më të madh të Rezolutës 1244, për hir të interesave të kompanive amerikane të naftës”, shpjegon Gjorgjeviq.
Presidenti i lëvizjes “Çlirimi” gjithashtu tha se asnjë “njohje e ndërsjellë” nuk do ta ndihmonte stabilitetin rajonal.
“Shtetet e Bashkuara pushtuan në mënyrë të paligjshme Kosovën dhe Metohinë me bazën Bondsteel dhe është koha që Serbia t’ua mohojë atyre mikpritjen në territorin e saj”, tha Gjorgjeviq.
Ai shtoi se lëvizja e tij politike do t’u jepte fund të gjitha marrëveshjeve të arritura mes Kosovës dhe Serbisë deri tash, përfshirë Marrëveshjen e Washingtonit dhe iniciativën e Shengenit të Vogël dhe se “do ta informonte Ambasadën e SHBA-së se trupat e tyre nuk janë të mirëseardhura në territorin e Republikës së Serbisë”.