Në një lëvizje të paprecedentë në politikën gjermane, kancelari Olaf Scholz bëri të ditur se ka kërkuar shkarkimin e ministrit të Financave, Christian Lindner, dhe do të kërkojë një mocion votëbesimi në Bundestag më 15 janar, duke hapur rrugën për zgjedhje të parakohshme që mund të mbahen në mars. Në një deklaratë të fuqishme, Scholz kritikoi ashpër Lindner-in dhe fajësoi partinë e tij liberale për bllokimin e propozimeve që ai i konsideronte vendimtare për rimëkëmbjen ekonomike të vendit.
Molla e sherrit: Kufizimi i buxhetit dhe mosmarrëveshjet për fondet
Kriza midis Scholz dhe Lindner-it u përshkallëzua kur kancelari kërkoi që të pezullohet përkohësisht kufiri i borxhit për të financuar katër paketa mbështetëse: një për çmimin e energjisë, një për mbrojtjen e vendeve të punës në industrinë e automobilave, një për stimuj për investime në Gjermani, dhe një për ndihmën e Ukrainës. Lindner refuzoi të pranojë kërkesën, duke bllokuar kështu shtimin e 10 miliardë eurove në buxhet, përfshirë 3 miliardë për Ukrainën, të cilat Scholz i konsideron jetike, sidomos pas fitores së Donald Trump-it në zgjedhjet presidenciale të SHBA-ve.
Scholz: “Qartësi e shpejtë për Gjermaninë”
Pasi njoftoi për mocionin e votëbesimit, Scholz vuri në dukje rëndësinë e miratimit të disa ligjeve të rëndësishme deri në Krishtlindje dhe bashkëpunimin me liderin e opozitës Friedrich Merz, për të forcuar ekonominë dhe mbrojtjen. Vendimi për të ndërmarrë votëbesimin ishte mbështetur edhe nga zv.kancelari Robert Habeck, i cili theksoi nevojën e Gjermanisë për veprim të shpejtë përballë situatës së pasigurisë ndërkombëtare.
FDP-ja tërhiqet nga koalicioni qeverisës
Me shkarkimin e Lindner-it, partia liberale (FDP) njoftoi se do të tërheqë të gjithë ministrat e saj nga qeveria, duke e çuar koalicionin trepalësh drejt një fundi të parakohshëm. Kryetari i grupit parlamentar të FDP-së, Christian Dürr, tha se është koha që zgjedhësit të vendosin për drejtimin e ardhshëm të vendit.
Opozita konservatore kërkon votëbesim të menjëhershëm
Partia opozitare CDU/CSU kërkoi që mocioni i votëbesimit të zhvillohet sa më shpejt. Nënkryetari i grupit parlamentar të CDU/CSU-së, Matthias Middelberg, deklaroi se Gjermania ka nevojë për një qeveri të re dhe efektive, ndërsa Roderich Kiesewetter sugjeroi se opozita mund të ndërmarrë një votë mosbesimi konstruktive për të zgjedhur Friedrich Merz si kancelar të ri.
Partitë populiste dhe krahu i majtë kritikojnë qeverinë e Scholz-it
Ekstremi i djathtë AfD përshëndeti shpërbërjen e koalicionit si një “çlirim për Gjermaninë,” ndërsa Sahra Wagenknecht e Aleancës Sahra Wagenknecht (BSW) kritikoi Scholz-in për zvarritjen e procesit të votëbesimit dhe për përparësitë e vendosura mbi ndihmat për Ukrainën, duke neglizhuar nevojat e brendshme të Gjermanisë.
Zgjedhjet e rregullta parlamentare në Gjermani ishin parashikuar për shtatorin e ardhshëm, por zhvillimet e fundit pritet t’i çojnë qytetarët gjermanë në kutitë e votimit disa muaj më herët./DW/