Gjermania njoftoi të premten se po “reduktonte me shpejtësi” varësinë e saj nga energjia ruse, përcjell UBT News.
Vendi ka plane të bëhet i pavarur nga qymyri rus deri në vjeshtë dhe pothuajse i pavarur nga nafta ruse deri në fund të vitit.
Varësia gjermane nga nafta ruse do të bjerë në rreth 25 për qind në javët e ardhshme, tha të premten ministri i ekonomisë dhe klimës Robert Habeck, me importet në Gjermani që pritet të përgjysmohen nga mesi i vitit pasi kompanitë do të lidhin kontrata me furnizues të rinj.
Deri në fund të vitit, Gjermania synon të jetë pothuajse e pavarur nga importet ruse të naftës.
Ndërkohë, varësia nga qymyri do të bjerë nga 50 për qind në rreth 25 për qind në javët e ardhshme.
Para pushtimit, Gjermania varej nga importet ruse për rreth një të tretën e naftës së saj dhe gati gjysmën e qymyrit. Por gazi rus përbën më shumë se gjysmën e importeve të gazit natyror të Gjermanisë, kështu që ulja e gazit natyror do të kërkojë më shumë përpjekje.
“Ka ende rrugë për të bërë dhe ne do të jemi në gjendje t’i themi lamtumirë gazit rus vetëm me një përpjekje të përbashkët – autoritetet federale, shtetërore, lokale, kompanitë dhe familjet private së bashku”, tha Habeck në një deklaratë.
Habeck tha se do të ishte e mundur që vendi i tij të bëhej i pavarur nga gazi rus nga mesi i vitit 2024. Ai tha se ishte ende shumë herët për një embargo të energjisë pasi “pasojat ekonomike dhe sociale do të ishin ende shumë serioze”.
“Por çdo kontratë furnizimi që ndërpritet e dëmton Putinin”, tha Habeck./UBTNews/