Franca ka bërë një apel të fortë për një ndryshim në politikat e sigurisë të Evropës, duke theksuar se kontinenti nuk duhet të mbetet i varur nga SHBA për mbrojtjen e tij. Sophie Primas, zëdhënëse e qeverisë franceze, theksoi se, megjithëse SHBA janë aleatët e Evropës, kontinenti duhet të marrë përgjegjësinë për sigurinë e tij. Ajo paralajmëroi se siguria e Evropës është e rrezikuar nëse vazhdohet të mbështetet te fuqitë e tjera.
Primas nënvizoi nevojën e një paqeje të qëndrueshme në Ukrainë, duke theksuar se pa angazhimin e Evropës dhe Ukrainës në bisedime, nuk mund të arrihet një marrëveshje e qëndrueshme. Ky qëndrim ka ardhur pas tensioneve të fundit në marrëdhëniet SHBA-Evropë, për shkak të diskutimeve të drejtpërdrejta të Presidentit të SHBA, Donald Trump, me Vladimir Putin, pa përfshirjen e Evropës.
Në Konferencën e Sigurisë së Mynihut, u konfirmua se evropianët nuk do të ftoheshin në bisedimet SHBA-Rusi për paqen në Ukrainë, ndërsa Sekretari i Mbrojtjes i SHBA-së sugjeroi që vendet evropiane të ofronin trupa paqeruajtëse, jashtë kuadrit të NATO-s.
Ky zhvillim pasoi një takim të liderëve evropianë në Paris, ku u diskutuan marrëdhëniet transatlantike dhe siguria e Evropës./UBTNews/
