Një dokument i Ministrisë së Mbrojtjes Ruse ka zbuluar se humbjet totale ruse në Ukrainë në vitin 2025 tejkalojnë 281.550, përfshirë viktimat dhe të plagosurit.
Ky informacion u publikua nga një organizatë joqeveritare ukrainase, ndërsa vlerësimet e pavarura nga Meduza dhe Shërbimi rus i BBC flasin për 219 mijë viktima në të njëjtin vit.
Këto të dhëna, megjithëse të ndryshme, konfirmojnë se pushtimi rus i Ukrainës, i cili ka vazhduar për gati katër vjet, pati pasoja shkatërruese edhe për vetë Rusinë, shkruan Forbes.
Rusia po vuan humbje të mëdha materiale dhe financiare, pasi dy të tretat e forcës së saj të tankeve para luftës janë shkatërruar, pothuajse gjysma e flotës së saj të Detit të Zi është fundosur ose dëmtuar, dhe sanksionet ndërkombëtare kanë shkaktuar humbje me vlerë qindra miliarda dollarë.
Ushtria ruse dhe demografia e vendit kanë pësuar goditjen më të rëndë, ku sipas The Guardian, Rusia ka pësuar mbi një milion viktima që nga fillimi i pushtimit në shkurt 2022, një shifër e konfirmuar në mënyrë të pavarur nga ministritë e mbrojtjes britanike dhe amerikane.
Raporti thotë se vdekjet ruse vlerësohen të jenë pesë herë më të larta se numri i përgjithshëm i vdekjeve në të gjitha luftërat sovjetike dhe ruse që nga fundi i Luftës së Dytë Botërore.
Një studim nga Mediazona, Meduza dhe Shërbimi rus i BBC zbuloi se burrat e moshës 30 deri në 39-vjeç ishin më të prekur nga lufta, dhe 12 gjeneralë ishin midis gati 6 mijë oficerëve të vrarë.
Për të tërhequr ushtarë të rinj, qeveria ruse po ofron bonuse nënshkrimi prej 4.970 dollarësh, një pagë mujore prej 2.500 dollarësh, pothuajse dyfishi i mesatares kombëtare, dhe një pagesë të njëhershme prej 158.000 dollarësh për familjet e viktimave.
Kriza demografike është thelluar më tej nga emigrimi ku që nga fillimi i pushtimit, pothuajse një milion rusë, kryesisht të rinj të arsimuar, janë larguar nga vendi, sipas Universitetit Stanford.
Vala e parë përbëhej nga kundërshtarë të luftës, të cilët u vendosën në vendet fqinje si Gjeorgjia dhe Kazakistani, ndërsa e dyta pasoi njoftimin e mobilizimit të pjesshëm në shtator 2022.
Përveç viktimave dhe eksodit të popullsisë, Rusia po përballet gjithashtu me një rënie të shkallës së lindjeve dhe një rritje të shkallës së vdekshmërisë.
Sipas një raporti nga Carnegie Endowment, njerëzit mbi 65-vjeç përbëjnë mbi 18 për qind të popullsisë, një rekord historik që po ushtron presion të madh mbi sistemet e pensioneve dhe kujdesit shëndetësor.
Popullsia e Rusisë ra nga 147 milionë në vitin 2021, në 144 milionë në vitin 2025. /S.K/KP/